13.5.2025

Arctica Finance gegnir hlutverki söluaðila í útboði á hlutum ríkisins í Íslandsbanka

Fjármála- og efnahagsráðuneytið, fyrir hönd Ríkissjóðs Íslands, tilkynnti í dag upphaf markaðssetts útboðs á almennum hlutum í Íslandsbanka hf. og birtingu tengdrar útboðslýsingar. Um útboðið hafa verið samþykkt sérstök lög frá Alþingi (lög nr. 80/2024) og byggir öll framkvæmd útboðsins á þeim.

Arctica Finance er í hlutverki söluaðila í útboðinu.

Einstaklingum og lögaðilum stendur til boða að taka þátt í útboðinu sem hófst í morgun og stendur til fimmtudagsins 15. maí n.k. kl. 17:00.

Til sölu eru að lágmarki 376.094.154 hlutir í Íslandsbanka hf, eða 20% af heildarhlutafé bankans. Þá hefur fjármála- og efnahagsráðherra heimild til að auka útboðsmagnið ef umframeftirspurn verður til staðar í útboðinu, og getur möguleg magnaukning numið öllum eftirstandandi hlutum ríkisins í Íslandsbanka eða samanlagt 45,2% af hlutafé.

Útboðslýsing var birt í dag þar sem tilkynnt var um stærð útboðsins og verð á hverjum hlut í tilboðsbók A, ásamt fleiri atriðum. Útboðslýsinguna má nálgast hér, en mögulegir kaupendur eru hvattir til þess að kynna sér vel innihald lýsingarinnar áður en ákvörðun um fjárfestingu er tekin, þ. á m. skilmála útboðsins og umfjöllun um áhættuþætti.

Í útboðinu eru þrír áskriftarmöguleikar í boði; tilboðsbók A, tilboðsbók B og tilboðsbók C sem eru mismunandi er varðar þátttöku, forgang, stærð áskrifta og úthlutun.

  • Tilboðsbók A er eingöngu ætluð einstaklingum með íslenska kennitölu. Í tilboðsbók A er fast verð, 106,56 kr. á hlut. Verðið byggir á meðalverði hlutabréfa í Íslandsbanka hf. síðustu 15 daga fyrir birtingu lýsingar. Í tilboðsbók A er heimilt að gera tilboð fyrir að lágmarki 100.000 kr., og allt að fjárhæð 20.000.000 kr.
  • Tilboðsbók B er opin bæði einstaklingum og lögaðilum. Útboðsgengi vegna tilboðsbókar B verður ákvarðað með tilboðsfyrirkomulagi og skal taka mið af hæsta tilboði sem nær lágmarks stærð útboðs, hins vegar má útboðsgengi tilboðsbókar B aldrei vera lægra en fast verð í tilboðsbók A. Lágmarkstilboð í tilboðsbók B er bundið við útboðshluti að verðmæti 2.000.000 kr. Engin hámarksupphæð á við um tilboð í tilboðsbók B að öðru leyti en því sem takmarkast af heildarstærð útboðsins.
  • Tilboðsbók C er opin eftirlitsskyldum fagfjárfestum sem gera tilboð fyrir eigin reikning og uppfylla það skilyrði að samanlögð fjárhæð eigna þeirra sé jafnvirði 70 milljarða kr. eða hærri. Lágmarkstilboð í tilboðsbók C er bundið við útboðshluti að verðmæti 300.000.000 kr. Engin hámarksupphæð á við um tilboð í tilboðsbók C að öðru leyti en því sem takmarkast af heildarstærð útboðsins. Útboðsgengi fyrir tilboðsbók C verður í íslenskum krónum og ákvarðað með hliðsjón af útboðsgengi fyrir tilboðsbók B. Fjárfestum sem gera tilboð í tilboðsbók C verður gefinn kostur á að hækka tilboð sitt til samræmis við útboðsgengi fyrir tilboðsbók B skömmu eftir að útboðsgengi fyrir tilboðsbók B er tilkynnt þann 15. maí n.k.

Áskriftartímabilið er frá kl. 8:30 þriðjudaginn 13. maí til kl. 17:00 fimmtudaginn 15. maí n.k. Gert er ráð fyrir að niðurstöður útboðsins verði birtar þann 15. maí 2025. Lokadagur greiðslu úthlutaðra hluta er ákveðinn 20. maí 2025.

Í útboðinu er sérstök áhersla lögð á þátttöku einstaklinga eins og lög nr. 80/2024 kveða á um. Úthlutun á bréfum á grundvelli tilboðsbókar A, þ.e. úthlutanir til einstaklinga með íslenska kennitölu, hafa forgang umfram tilboðsbækur B og C, og munu þeir njóta lægsta verðs.

Athygli er vakin á því að fjármála- og efnahagsráðuneytið mun birta lista yfir kaupendur, bæði einstaklinga og lögaðila, að útboði loknu.

Hafa má samband við markaðsviðskipti Arctica Finance vegna hugsanlegrar þátttöku í útboðinu:

Aðrir íslenskir söluaðilar eru Arion banki hf., Kvika banki hf. og Landsbankinn hf. Upplýsingar um söluaðila má finna á heimasíðu stjórnarráðsins.

❮ til baka